Laçi udhëton nesër në transfertë për tu përballur me Skënderbeun në Korçë në orën 19:45, sfidë e vlefshme për javën e tretë të kampionatit në Superligë. Sigurisht që për kurbinasit nuk do të jetë një përballje e lehtë ajo ndaj korçarëve.
Këtë fakt e pranon edhe trajneri i kurbinasve, Artan Mërgjyshi i cili e vlerëson kundështarin dhe pranon se është një sfidë delikate por që në fund skuadra e tij do tentojë të marrë një rezultat pozitiv nga ky takim.
"Skënderbeu është një skuadër që përpos eksperiencës ka energji dhe cilësi brenda, një skuadër që jo rastësisht është në vend të parë pasi ka elementë dhe strukturë loje të mbartur, janë fjalët më të mira për to. Ne vijmë nga dy ndeshje pozitive dhe ajo me Skënderbeun vjen si ndeshje me rival direkt. Ne do të vijmë për pikë dhe do të jetë shumë e vështirë për të dyja skuadrat.
Barazim? Nuk kemi synim që të marrim një pikë. Është pak e rëndësishme si luan brenda apo jashtë pasi në Korçë ka ambient të mirë dhe fusha është shumë e përshtatshme për të luajtur e për të synuar. Rezultatet janë të treja brenda ndeshjes dhe duhet t'i bëjmë hyzmetin për më të mirën. Kemi prurjet e reja që nuk janë ambientuar ende por do t'i provoj këtë ndeshje.
Të gjithë që kanë punuar këtu kanë merita por edhe presidenti. Ka grintë dhe besim në skuadër dhe pavarësisht se jemi skuadër me të rinj, janë luftëtar dhe s'kanë frikë ndaj kundërshtarit dhe kjo është armë plus për ne. E treguam edhe në Europë këtë gjë.
Objektiva të përcaktuara nuk ka pasi ende nuk është mbyllur që merkatoja. Laçi është mësuar përpara që ka mentalitet fituesi dhe që shkon në Europë. Objektivat tona janë për lart në mendje por asgjë nuk është e përcaktuar qartë", është shprehur trajner i Laçit pak orë para sfidës me Skënderbeun.
Lexo gjithashtu
