Edhe Kategoria e Parë ashtu si Superiorja ditën e sotme do të luajë disa ndeshje që janë të vlefshme për javën e dytë të kampionatit. Saktësisht 5 përballje do të luhen në të njëjtën orën, 16:00.
Kështu Iliria do të luajë ndeshjen e parë në shtëpi për këtë sezon, teksa do të presë në “Redi Maloku” skuadrën e Pogradecit. Të dyja skuadrat do të luftojnë mes tyre për 3 pikët e para në kampionat.
Një tjetër përballje eshtë dueli mes Korabit dhe Besës. Të dyja ekipet pas barazimeve në javën e parë të kampionatit do të bëjnë mes tyre llogaritë për 3 pikët. Interesante është edhe sfida mes Laçit e Kastriotit, përballje që do të luhet në stadiumin e Laçit. Kurbinasit pas fitores ndaj Ilirisë synojnë një tjetër 3 pikësh në kampionat ndaj krutanëve. Këto të fundit në sfidën e parë të sezonit nuk shkuan më shumë se barazimi 1-1 me Besën.
Apolonia – Luftëtari është gjithashtu një tjetër ndeshje që luhet ditën e sotme. Fierakët synojnë kthesën në kampionat pas humbjes me Kukësit, ndërsa gjirokastritët pas barazimit në javën e parë këtë herë do të synojnë 3 pikët.
Ndeshja e fundit e ditës së sotme në Kategorinë e Parë do të jetë mes Burrelit dhe Kukësit. Verilindorët pas triumfit në shtëpi javën e parë në transfertë do të jenë sërish “all-in” për 3 pikët, ndërsa matjanët synojnë të bëjnë “autokritikë” për humbjen 3-0 një javë më parë.
E shtunë, 30 gusht
Iliria – Pogradeci 16:00
Korabi – Besa 16:00
Apolonia – AF Luftëtari 16:00
Laçi – Kastrioti 16:00
Burreli – Kukësi 16:00
