Mund të ndodhë shpesh herë të jemi të fiksuar pas një lojtari që bën diferencën në një ekip për të cilin bëjmë tifo. Mund të ndodhë që të ndjekin çdo takim të skuadrës së zemrës në stadium duke shpenzuar shuma të mëdha parash, por mund të ndodhë që edhe të zhgënjehesh nga idhulli yt pasi braktis skuadrën për të shkuar në një tjetër ekip.
E tillë është historia e pogradecarit, Adi Nurka. Ai jeton në Gjermani prej kohësh dhe është tifoz i “çmendur” i “yllit” portugez, Cristiano Ronaldo. Ai ka ndjekur thuajse cdo takim të madrilenëve në stadium, ka blerë çdo veshje të mundshme me numrin 7, e cila mbahej nga Ronaldo te Real Madridi.
Edhe pse sulmuesi i njohur ishte një “idhull” për të riun pogradecar, pas transferimit të portugezit te Juventus, duket se gjërat kanë ndryshuar. Në një rrëfim të shkurtër për Newsport.al, Nurka tregon pak detaje nga historia e tij që e lidh atë me Ronaldon.
“Si thuajse gjithë të rinjtë edhe unë bëj tifo për një skuadër, ky ekip është Real Madridi. Për të gjithë tifozët madrilenë idhull për ne ishte Cristiano Ronaldo. Edhe pse mund të duket disi e çuditshme, shpesh herë miqtë dhe shokët më thonë se kam një ngjashmëri të madhe me portugezin. Kam qenë aq i fiksuar sa kam blerë thuajse çdo gjë që mbante numrin 7. Kam shpenzuar më shumë se 3 mijë euro për veshje dhe aksesorë të ndryshëm. Them kaq qenë i fiksuar, kjo pasi pas largimit të Ronaldos te Juventus, gjërat kanë ndryshuar, jo vetëm për mua por për 90 për qind të tifozëve të Real Madridit. Unë si tifoz i “çmendur” nuk mundem ta shikoj Ronaldon të luajë për një tjetër skuadër, nuk është se nuk dua, por duke ditur që e kam adhuruar me fanelën e Realit nuk mund ta bëj këtë gjë ndërkohë që ai është te Juventusi”, kanë qenë fjalët që i riu pogradecar ka thënë për Newsport, ku tregon zhgënjimin e madh që ka përjetuar si tifoz pas transferimit të Cristiano Ronaldos te Juventus.
Loading ...
