Klubi i Partizanit ka dalë pak minuta më parë me një reagim në faqen zyrtare në Facebook, pas vendimit të Disiplinës për të dënuar të kuqtë me 4 ndeshje pa tifozë.
Sipas asaj që lexohet në reagimin e klubit të kuq, vendimet e FSHF-së janë në favor të rivalëve të tyre për titull kampion dhe se e cilësojnë të palogjikshme që provokuesit (Kukësi) dhe dhunuesit të gjobiten, ndërsa viktimat (Partizani) të dënohen me 4 ndeshje. Kjo referuar ngjarjeve të ndodhura në sfidën Kukësi-Partizani 0-0, ku pati trazira në stadium dhe ku tifozët e kuq pretenduan se u goditën me gurë nga tifozët e Kukësit nga jashtë stadiumit.
“REAGIM NDAJ VENDIMIT TE KOMISIONIT TE DISIPLINES
Klubi i Partizanit shpreh shqetësimin për favorizimet që FSHF po i bën ekipeve të caktuara në kampionat dhe vazhdon të dëmtojë në mënyrë të personalizuar klubin e Partizanit. Vendimi i Disiplinës është një tjetër sulm direkt i FSHF-së, pasi edhe pse prezumohet të jetë një organ gjyqësor i pavarur, minimalisht bazohet te relacionet e zyrtarëve të FSHF-së në atë ndeshje.
– Denoncuam menjeherë pas ndeshjes që grupimi i tifozëve të Partizanit u provokua me gurë që vinin nga jashtë stadiumit prej të cilëve u dëmtuan edhe disa prej tifozeve.
– Dy tifozeritë gabuan që hodhën sende në fushë, çka u vu re qartë edhe në televizor, por edhe nga zyrtarët e FSHF. Ndryshimi te tifozët e Partizanit ishte se ndodhi në kushtet e vetëmbrojtjes dhe gjatë momentit që po goditeshin nga gurët që vërshonin, por edhe nga shkopinjtë e gomës së policisë. Ndërsa tifozeria vendese e kishte të pajustifikuar hedhjen e stolave në fushë.
– Në tribunën qëndore janë hedhur sende të forta, prej të cilave u goditën dy persona, njëri prej të cilëve u gjakos sipër vetulles. I radhitëm këto argumenta për të sqaruar opinionin se si Federata ka vendosur të dalë hapur, si një organ opozitar ndaj futbollit të drejte dhe garës së ndershme sportive.
E cilësojmë të palogjikshme që provokuesit dhe dhunuesit të gjobiten, ndërsa viktimat të dënohen me 4 ndeshje. Këto vendime maskaradë të Federatës, që merr guximin të cënojë në mënyrë të hapur garën për titullin kampion, thjesht na bën më të fortë. Partizani i garanton FSHF-së, se pavarësisht këtyre pengesave që na bën dhe favorizimeve ndaj rivalëve direkt, neve na bën më të fortë, më të egër në realizimin e objektivave, duke luajtur me ndershmëri. Gjithashtu, premtojmë se do marrim masa ndaj sulmeve tendencioze dhe burracake…”, lexohet në deklaratën për shtyp të klubit të Partizanit.
Loading ...
