Lionel Messi është një nga lojtarët kryesorë si te PSG ashtu edhe tek Argjentina, e cila aktualisht synon fitimin e trofeut të Kupës së Botës. Pikërisht e ardhmja e argjentinasit është në dyshim, duke qenë se kontrata aktuale i përfundon në fund të këtij sezonit. Inter Miami po tenton të bindë “Pleshtin”, por nga krahu tjetër Barcelona synon rikthimin e tij në “Camp Nou” duke trazuar paksa mendimet.
Por te PSG shprehen se me Messin do të bisedojnë pas Kupës së Botës, ku Nasser Al-Khelaifi zbuloi gjithashtu se kë lojtar dëshiron ta transferojë gjatë merkatos së janarit.
Messi? “Me Messin kemi rënë dakord që të diskutojmë pas Kupës së Botës, të dyja palët janë shumë të lumtur nga ky bashkëpunim. Ai është shumë i kënaqur nga klubi i PSG dhe diçka e tillë dallohet edhe në kombëtaren e Argjentinës, e shihni sa i lumtur është? Me ne ka zhvilluar një super sezon.
Rashford? Është me të vërtetë një djalosh i jashtëzakonshëm, nëse largohet me zero nga United të gjithë do të duan të firmosin me të. Ne nuk fshihemi dhe në të kaluarën kemi biseduar me të, por nuk ishte momenti i duhur. Pse jo në merkaton e verës? Mund të flasim, por tashmë është i përqendruar te Kupa e Botës. Pastaj në janar të shohim, me pak fat dhe nëse na intereson, atëherë do të flasim me të”, u shpreh presidenti i PSG-së.
Lexo gjithashtu
