Xhani de Biazi ka dhënë sot një intervistë për ” TuttoMercatoWeb” ku ka folur për ndeshjen kundër Italisë më 24 mars, të ardhmen e tij dhe ofertat nga Seria A.
“Gara për mbijetesë në Serinë A? Krotone dhe Peskara nuk kanë shanse për mbijetesë. As Palermo nuk mendoj se ka shpresa për të qëndruar në Serinë A. Kam luajtur tre vite atje dhe dëshiroj të qëndrojë, por shumë e vështirë të ndodhë”, komenton De Biazi garën për mbijetesë në Serinë A.
Trajneri i Kombëtares kuqezi pranon se ka pasur së fundmi një ofertë nga Palermo për të drejtuar skuadrën siçiliane. “Po, kam folur me presidentin Zamparini dy herë për këtë temë. Por nuk dëshiroja të lija kombëtaren e Shqipërisë. Nuk janë kushtet e duhura për të drejtuar Palermon? Kaljari? Nuk kemi pasur kontakt të drejtpërdrejt”, pranon trajneri italian.
Për sa i përket ndeshjes Itali-Shqipëri që do të luhet më 24 mars në Palermo, De Biazi komentoi se: “Kam shkuar para një muaji atje për të parë hotelin ku do qëndrojmë dhe stadiumin. Kur shkoj në Palermo, ndihem nostalgjik. Shpresoj t’u kem lënë shije të mirë tifozëve të Palermos”, sqaron De Biazi që jep sërish një përgjigje diplomatike për çështjen e rinovimit ose jo me FSHF-në: “Në fund të sezonit, skadon kontrata ime me kombëtaren e Shqipërisë. Do flasim sërish, por duhet të arrihet një marrëveshje dy-palëshe”.
Loading ...
