Mevlan Murati nuk është më lojtar i Shkëndijës së Tetovës. Është klubi shqiptar i Maqedonisë së Veriut që ka bërë me dije se palët kanë zgjedhur t’i japin fund bashkëpunimit. Nëpërmjet një komunikate në kanalet zyrtare të informimit bëhej e ditur:
“Fundi i sezonit të kaluar solli skadimin e kontratës së Mevlan Muratit dhe KF Shkëndija i dëshiron futbollistit gjitha të mirat në të ardhmen.
KF Shkëndija dëshiron të shprehë mirënjohjen maksimale për Mevlan Muratin, futbollist që mbrojti ngjyrat e klubit tonë për nëntë sezone. Ai doli nga shkolla e futbollit Shkëndija dhe mbetet pjesë e periudhës më të suksesshme në historinë e klubit tonë.
Mevlan Murati fitoi 5 tituj me Shkëndijën: 3 tituj kampion më LPFMV, 1 Kupë dhe 1 Superkupë të vendit.
Kontributi dhe sjellja shembullore e Mevlan Muratit do të vlerësohet gjithmonë në klub. Secili në KF Shkëndija i uron shëndet dhe gjitha të mirat në të ardhmen”.
Kujtojmë që në Shqipëri, Mevlan Murati ishte pjesë e Partizanit duke qenë titullar i padiskutueshëm në linjën e djathtë të mbrojtjes së kuqe.
