Tirana zyrtarizoi sot në mesditë sulmuesin 27 vjeçar Tim Vayrynen. Futbollisti është lindur në 30 mars 1993 në Espoo të Finlandës, teksa ka zhvilluar edhe 12 paraqitje me Kombëtaren A e këtij vendi në futboll. I gjatë 1.91 metra, Vayrynen e ka nisur karrierën te moshat e Honka, për të luajtur edhe me ekipin e parë.
Janari I 2014 do shënonte një periudhë të veçante për të, pasi ai kaloi në ekipin e dytë të Borussia së Dortmundit në Gjermani, duke u parë si një ndër talentet e sulmit. Edhe pse nuk ia doli të luajë në ekipin e parë të Dortmund, karriera e tij në Gjermnai është e larmishme.
27 vjeçari ka luajtur me Viktoria Koln, Dynamo Dresden apo Hansa Rostock, për të kaluar në verën e 2018 te Roda në Hollandë. Pas një sezoni me hollandezët, në 2019 ai u bashkua me kampionët e Finlandës, Helsinkin, ku zhvilloi 1 sezon e gjysmë.
Në të gjithë karrierën ai ka shënuar 83 gola, duke dhuruar edhe 19 asiste. Në ligën finalandeze ia ka dalë të shënojë 45 gola në 109 ndeshje, teksa shihet si përforcim i rëndësishëm për bardheblutë kampion të Shqipërisë.