Edlir Tetova foli në konferencën për shtyp përpara ndeshjes gjysmëfinale të Final Four përballë Vllaznisë. Trajneri i Egnatias u shpreh se skuadra gëzon një moral të lartë pas suksesit në Kupën e Shqipërisë dhe se do të tentojnë fitoren për të shkuar drejt titullit kampion.
Gjendja e skuadrës pas finales së Kupës?
Fitimi i Kupës na bëri mirë, sjellim një tjetër trofe për klubin, për mua personalisht dhe për lojtarët. Një bonus i madh dhe shkojmë më të qetë në Final Four.
Strategji për Vllazninë?
E kemi, nuk është nevoja të zgjatemi pasi janë lojëra delikate. Mendoj se episodet do të zgjidhin gjithçka.
Gjendja fizike?
Shumë e mirë, rikthehet edhe Aleksi. Kam besim te grupi, është i plotë dhe mendoj se çdo gjë do të shkojë mirë.
Rikthimi i Aleksit, tani moduli 4-3-3 apo sërish me 3 në prapavijë?
Është shpejtë për të folur, do të shohim stërvitjen e fundit. Janë ndeshje që zgjidhen me detaje. Në fushë do të hedhim lojtarët më të mirë.
Çfarë i kërkuar futbollistëve pas fitores së Kupës?
Lojtarët e dinë rëndësinë e trofeut të dytë. Jep impulse të mira, ne kërkojmë më të mirën.
Mesazhi për tifozët rrogozhinas?
Na duheni në stadium.
Presion për lojtarët shkodranë të Egnatias para ndeshjes me Vllazninë?
Mendoj se jo. Djemtë kanë qenë në fushë edhe në ndeshje të tjera. Do të japin maksimumin edhe ndaj Vllaznisë, janë futbollistë profesionistë dhe kanë treguar se luajnë përballë çdo kundërshtari.
Balaj rreziku kryesor i Vllaznisë, si do ta ndaloni?
Kampionati ka mbaruar, Balaj ishte golashënuesi më i mirë në kampionat, por ky është kompeticion tjetër. Balaj meriton vëmendjen kryesore pasi doli golashënues, por ne do të jemi grup dhe mendoj se do të bëjmë mirë.
Në favor edhe barazimi, a do të mbroni avantazhin apo do të sulmoni si zakonisht?
Ne jemi karakterizuar si ekip prodhues dhe do të vazhdojmë kështu.
Lexo gjithashtu
