
Vllaznia u mposht nga Skënderbeu në javën e 3-të të Superiores. Një humbje që “dhemb” për shkodranët, të cilët tashmë e shikojnë veten në vendin e 6-të, me 4 pikë.
Kuqeblutë nuk kanë shumë kohë për të humbur, pasi dueli i radhës në kampionat do të jetë ndaj kampionëve në fuqi. Kështu Vllaznia do të presë Egnatian në “Loro Boriçi”, sfidë që do të luhet ditën e mërkurë në orën 19:00.
Për ta nuk do të jetë aspak e lehtë, pasi Thomas Brdaric do të përballet edhe me mungesat. Kevin Dodaj u ndëshkua me karton të kuq ndaj Skënderbeut, duke lënë fushën e lojës që në minutën e 26-të.
Në këtë mënyrë talenti i shkodranëve do të jetë i pezulluar dhe Brdaric duhet të bëjë pa shërbimet e tij ndaj rrogozhinasve. Ndërkohë trajnerin e mban “pezull” Ardit Deliu, i cili ka pësuar një dëmtim dhe nuk dihet nëse do të jetë i gatshëm për të mërkurën apo jo.