Pandemia e Covid-19 ka ndikuar keq në të gjitha sportet, teksa Federata e Futbollit e Kosovës ka bërë me dije se ka shpërndarë 200 mijë euro për 10 klubet elitare në vend.
Reagimi zyrtar I FFK-së vjen në një kohë kur në medie të ndryshme kosovare flitet se futbolli është lënë në mëshirë të fatit prej pandemisë, duke akuzuar drejtpërdrejt Federatën.
Federata bën me dije se ajo do të jetë në mbështetje të klubeve sportive, duke pasqyruar edhe pagesat për lojtarët dhe stafet teknike në kohën e Covid-19, kur vendi ishte në karantinë.
Reagimi I Federatës së Futbollit kosovar:
30 tetor, 2020 – Federata e Futbollit e Kosovës sqaron opinionin lidhur me pohimet e pavërteta të disa drejtuesve të klubeve në media për kinse mos përkrahje financiare nga ana e federatës gjatë kohës së pandemisë Covid-19.
FFK është e vetëdijshme se kjo pandemi ka shkaktuar krizë të thellë në ekonominë globale dhe natyrshëm kjo ka prekur edhe ekonominë e vendit, e më këtë edhe ata që janë investitorë në klubet tona.
Pikërisht për këtë arsye, FFK që nga fillimi i pandemisë u ka dalë në mbështetje klubeve me fondet e saj që i ka akumuluar nga sponsorët dhe të hyrat tjera, me qëllim që t’u lehtësohet zhvillimi i aktiviteteve.
Një praktikë të tillë të përkrahjes FFK e ka vazhduar edhe në edicionin e ri të garave, ku në fillim të shtatorit klubet janë ndihmuar me mjete financiare. Prandaj, drejtuesit e klubeve duhet të jenë të kujdesshëm për atë çfarë deklarojnë në media dhe të mos e ‘ushqejnë’ opinionin me dezinformata.
Njëherësh, të gjithë duhet ta kenë të qartë se Federata nuk mund t’ua mbulojë klubeve pagat e stafeve, por thjesht do të jetë e gatshme përherë të ndihmojë me aq mjete sa ka mundësi dhe për aq kohë sa nuk i rrezikohen projektet e saj.
Po ashtu, rikujtojmë se klubet nuk paguajnë as koutizim, as gjyqtarët dhe nuk kanë asnjë shpenzim tjetër ndaj federatës, përveç dënimeve që mund t’u shqiptohen për shkelje eventuale gjatë ecurisë së garave.
Më poshtë gjeni tabelën e mjeteve të ndara për klubet e Superligës në fillim të edicionit të ri: