Tjetër operacion për mesfushorin bardheblu, gati për 3 javë

Gjergji Muzakës nuk po i cën shumë këto vitet e fundit, pasi ka pësuar disa dëmtime. Pak ditë më parë ai ka bërë një operacion të dytë të klavikulës, sepse ngjitja nuk ishte bërë si duhet nga operacioni i parë, pas dëmtimit të pësuar në ndeshjen me Bylisin sezonin e fundit. Pozitiv është fakti që aktualisht nuk ka aktivitet dhe futbollisti ka mundësinë të riaftësohet pa u nxituar aspak. Nga sa mësohet, Muzaka do të jetë gati për trajnerin Ilir Daja pas tri javësh. Ai do të ingranohet gradualisht në grup dhe për sezonin e ri pritet të jetë në gjendjen optimale. Mesfushori i krahut të djathtë është shumë i rëndësishëm për Tiranën, që deri tani nuk ka bërë përforcime në merkaton e verës.