Trampolina e lojtarëve shqiptarë për t’u shitur në Europë gjithnjë kanë qenë ndeshjet në Champions apo Europa League. Kujtojmë që sezonin e shkuar u larguan nga Shqipëria Peter Olayinka dhe Bernard Berisha, të cilët ranë në sy në ndeshjet në grup dhe jo vetëm. Ata u kërkuan edhe në merkaton e verës së shkuar, por vlera e blerjes nuk ishte në kuotat që kërkonte klubi korçar.
Kështu ka ndodhur edhe me të tjerë futbollistë shqiptarë në vitet e shkuara, të cilët tashmë ndodhen në kampionate të ndryshëm në botë. Por, këtë vit Skënderbeu nuk do të luajë në Europë, kështu që lojtarët korçarë janë në hije.
Megjithatë, një rrugë e re bashkëpunimi ka nisur, ajo mes presidentit Ardjan Takaj të Skënderbeut dhe Safet Gjicit të Kukësit, e cila pritet të japë frytet e saj. Të dy kanë gjetur gjuhën e përbashkët për të shkëmbyer lojtarë. Por, më të fituar në këtë merkato janë korçarët. Huazimi i futbollistëve ka për qëllim reklamimin e tyre në Europë dhe rënien në syrin e klubeve të huaja, të cilët janë në gjueti për futbollistë.
Pikërisht për këtë, Skënderbeu ka huazuar te Kukësi tre lojtarët më të mirë që ka në përbërje; Sabien Lilaj, Liridon Latifi dhe Masato Fukui. Ndërsa nuk dihet nëse Hamdi Salihi do të pranojë të bëhet pjesë e verilindorëve për ndeshjet në Europa League.
