Skualifikimi i Skënderbeut, dosja përfundon në Cas

Klubi i Skënderbeut qëndron përballë akuzave të ndërkombëtareve duke u shprehur për pafajsinë e tyre dhe kundër dënimit të dhënë nga Uefa. Korçarët insistojnë që pretendimet e ndërkombëtarëve pas një hetimi gjashtë vjeçar do të hidhen të gjitha poshtë përballë Kas-it të Lozanës. Në komunikatën për shtyp të klubit shkruhej:

“Duke marrë shkas nga shkrimet e ndryshme në median e shkruar dëshirojmë të sqarojmë opinionin publik dhe ambjentin sportdashës në Korçë se Skënderbeu nuk është dënuar absolutisht për asnjë ndeshje specifike ndryshe nga çfarë shkruhet sot. Vendimi vjen si pasojë e një hetimi për 6 vitet e fundit. Raporti dhe vendimi nuk ka asnjë fakt se klubi ynë ka trukuar por kemi të bëjmë me aludime, burimet e të cilave janë mediat Shqiptare dhe rrjetet sociale. Qesharake apo jo kjo është e verteta. Shumica këtyre ndeshjeve të dyshuara kanë dështuar të trukohen dhe ky është një fakt.Klubi ynë nisur nga ky raport i mbushur me aludime dhe aspak i faktuar shprehet i bindur se fitorja e madhe do vijë në CAS atje ku kombëtarja Shqiptare fitoi të drejtën e saj muaj më parë.Lusim mediat e ndryshme të mos aludojnë në dëm të klubit tonë dhe tifozëve Korçarë. Ky është një hetim 6-vjeçar që u justifikua nga organet e UEFA-s me një dënim aspak të faktuar. Një hetim 6-vjeçar që nuk ka asnjë provë që implikon klubin tonë.Shkojmë të qetë në organin më të lartë të drejtësisë sportive.”  Ndeshja kryesore që ndërkombëtaret mbështeten për trukimin e ndeshjeve është ndeshja e luajtur me 21 korrik 2015 ndaj Krusaders, që përfundoi 3-2 në favor të Irlandezëve.