Seria A dashurohet me kuqezinjtë, do të ketë sa më shumë

Paraqitja mjaft e mirë e Shqipërisë në Europianin e Francës ka përforcuar mendimin se titullarët e saj kanë kualitet dhe mund të luajnë edhe me klube me emër në Europë. Në Serinë A janë zyrtarisht në këtë moment 3 shqiptarë, ku Berishës dhe Hysajt i është bashkuar edhe Memuashaj me Peskarën e tij, ndërkohë që edhe Ajeti do të luajë në këtë kategori, duke lënë Frozinonen për një ekip më të mirë. Ajo që bie në sy është se Lacio dhe Napoli, që mund t’i lëshonin shqiptarët e tyre, pra Berishën dhe Hysajn, tani kanë ndërruar mendje. Ata i duan me çdo kusht kuqezinjtë dhe kjo është gjë e mirë. Arlind Ajetin e kërkojnë disa skuadra të Serisë A, së fundi edhe Bolonja. Por edhe Armando Sadiku ëndërron Serinë A dhe Sampdoria është deri tani skuadra që ka shfaqur interes për të. Pas Francës, në Itali ka më shumë afeksion për lojtarët kuqezi, kjo duket qartë.