Katar 2022
Gerhard Progni ka mbyllur aventurën futbollistike në Azerbajxhan me skuadrën e Ziras dhe është gati të kthehet në Superiore. Edhe pse dëshira e tij ishte të vijonte karrierën futbollistike jashtë Shqipërisë, gjasat janë që 30-vjeçari t’i bashkohet njërës nga skuadrat pretendente për titull kampion.
Kukësi është në kërkim të një lojtari krahu në mesin e fushës, ndërkohë që edhe Partizani ka shprehur interes për shërbimet e mesfushorit. Cilësitë dhe përvoja e Prognit në kampionatin shqiptar janë të padiskutueshme dhe kalimi i tij tek të kuqtë, do të ndihmonte Partizanin në arritjen e objektivit, titullin kampion. Megjithatë vetëm në ditët e ardhshme do të mësojmë për të ardhmen e Prognit, pasi nuk përjashtohet edhe ndonjë lëvizje surprizë.
Gerhard Progni është një lojtar me eksperiencë në kampionatin shqiptar. Ai ka luajtur me skuadra të elitës si Partizani, Dinamo, Flamurtari, Kukësi, Skënderbeu dhe Besa.
