Berat Xhimshiti po fiton nga pak sigurinë në vetvete. Pas një periudhe të gjatë ku u huazua te Avellino dhe Benevento, qendërmbrojtësi shqiptar po kthehet në titullar të padiskutueshëm te Atalanta.
Që nga fillimi i këtij sezoni në kampionatin italian, Xhimshiti nuk ka munguar në asnjë takim duke u kthyer në futbollistin kyç të skuadrës nga Bergamo. Por ditët e fundit mësohet se teknikui Gasperini nuk dëshiron të humbasë shërbimet e futbollistit të Kombëtares së Shqipërisë dhe i ka kërkuar klubit të zgjasë kontratën me futbollistin shqiptar. Nëse drejtuesit vazhdojnë t'i japin besim, Xhimshiti mund të mos mendohet dy herë për të rinovuar me Atalantën.
Në këtë merkato verore, në adresë të tij pati shumë oferta, por në momentet e fundit Xhimshiti mori telefonatën që ktheu çdo gjë pas. Sot ai pret të japë maksimumin në supersfidën me Skocinë.
