Presidenti i FSHF-së, Armand Duka ishte prezent në ceremoninë e dorëzimit të titullit "Kavalier" për trajnerin De Biazi nga shteti italian.
Duka foli për Supersport, ku padyshim, theksin e vuri te sfida e radhës e Kombëtares, ajo kundër Italisë.
”Çdo takim duhet të përgatitet mirë pavarësisht se cili është kundërshtari që ke përballë. Duhet të vlerësojmë maksimalisht çdo kundërshtar, por jo ta mbivlerësojmë ose nënvlerësojmë atë. Kundërshtari i radhës është Italia, të gjithë e njohin Italinë, na pret një ndeshje e vështirë, por ne po përgatitemi mirë dhe unë uroj që të marrin një rezultat pozitiv ndaj Italisë.
Do të jem shumë i kënaqur nëse do të luajmë mirë, do të kënaqim spektatorët pastaj rezultati nuk varet vetëm nga kjo, na duhet edhe pak fat.
Kombëtaret e moshave? E ardhmja e Shqipërisë është e mirë. Në ekipet e moshave, Bushi dhe Bogdani po punojnë mirë. Ata të dy i kanë dhënë shumë ekipit kombëtar, dhe tani po përpiqen të përcjellin filozofinë e tyre te lojtarët e rinj. Po u përcjellin atyre idetë por edhe vlerat e tyre, po përpiqen të jenë mësues por edhe edukatorë të mirë për futbollistët e rinj. Unë besoj se do t'ia dalin”.
