Peskara dhe Ledjan Memushaj janë tashmë pjesë e Serisë A. Një sukses për skuadrën e drejtuar nga trajneri Masimo Odo, ku mesfushori vlonjat ka një meritë të veçantë. Por klubi i sapongjitur në elitën e futbollit italian, që duket i dashuruar me shqiptarët, kërkon të afrojë edhe Arlind Ajetin, me ngulm madje. Paraqitja shumë e mirë e qendërmbrojtësit 22-vjeçar ka bërë që ai të marrë vlerësime maksimale dhe të vihet në shënjestrën e shumë klubeve europiane. Sezonin e fundit Ajeti luajti me fanellën e Frozinones, që ra në Serinë B, por gjasat janë të mëdha që ai të mbetet në Serinë A, me fanellën e Peskarës.
