Nuk ishte vetëm Elseid Hysaj protagonist në golin e tij, por edhe Rei Manaj që me asistin e dhënë tashmë ka përfunduar në gojën e europianëve. Së fundmi, është UEFA që ka publikuar në kanalin zyrtar momentin kur sulmuesi ynë arrin të mrekullojë me pasimin e dhënë për mbrojtësin shkodran, teksa me thembër çon bukur sferën aty ku Hysaj s’e ka të vështirë të përshëndese rrjetën e miqve.
Atij i është dhënë vendi i parë duke e cilësuar: “Aftësia më e mirë e ditës”. Edhe pse ishte mjaft e vështirë të jepej një pasim i tillë duke qenë se Manaj ishte me shpinë dhe duhej futur topi mes mbrojtjes islandeze, sulmuesi i talentuar ia doli duke u vlerësuar në këtë mënyrë edhe nga UEFA.