Olsi Rama është i ftuar në emisionin “Skaner” teksa po flet për skuadrën e Partizanit. Drejtori i përgjithshëm i të kuqve analizoi shkurtimisht ekipin e tij, ndërsa vuri theksin se kjo skuadër është ndërtuar për të ardhmen.
Tregoi dhe se çfarë kishte ndodhur në merkaton e verës, refuzimet e Dajës si dhe premisat për të ardhmen. Në fjalën e tij në panel, kreu i 16-herë kampionëve të Shqipërisë u shpreh:
“Do të vazhdoj dhe unë në rrugën që nisi trajneri i Kukësit për të thënë që synimi im është të përmirësoj ekipin që kam. Fitimi i kampionatit fillon aty, por puna më e madhe bëhet gjatë sezonit. Unë bëj dhe punën e drejtorit sportiv, pak nga halli, bashkë me stafin teknik. Bëjmë evidentimin e problemeve për të parë ku janë problemet.
Ne vinim nga një kampionat që bëmë mirë me Dajën. Synimet e të gjithëve është që Partizani të shpallet kampion. Kjo s’bëhet në letër, por në fushë. Kam kërkuar të ndërtojmë një ekip për të fituar në vazhdimësi. Kjo është sfida ime, këtu hyn dhe diskutimi për ndërtimin e akademisë etj. Por, fillimisht duhet të kesh burimet njerëzore pranë shtëpisë. Elementët e tjerë shtohen nga Shqipëria apo rajoni, pse jo edhe në Europë.
Kam filluar të shqetësohem pas barazimit me Skënderbeun dhe më pas me Vllazninë. Fillova të shoh një ekip që u ndrydh. Ne e vuajtëm më shumë psikologjikisht. Kur ndodh kjo gjë, s’bën ato gjëra që duhet të bësh në fushën e blertë. E kemi biseduar dhe me stafin teknik. Ne jemi duke u formuar. Është punë në vazhdim.
Largimet e vjetshme? Që përpara të ishte koha e merkatos, u munduam të identifikonim lojtarët që na duheshin. Tentuam dhe me ata që kishim, por ishte e vështirë sepse u rritën mirë dhe morën oferta tunduse që kampionati shqiptar s’i ofron. Në një realitet si Partizani kujdesemi në një mbarëvajtje. Nuk mund t’i pengonim të largoheshin. Jemi plotësuar mirë në mbrojtje dhe në mesfushë. Në sulm kemi nevojë, jo vetëm në sensin për 11-shen e parë, por edhe për alternativa. Menduam që me Malën dhe Filipoviçin menduam që kishim plotësuar diçka. Mala është një lojtar xhol, luan në shumë pozicione. Po luan në sulm dhe nuk është në nivelin që ka vetë si futbollist. Ka treguar rritje në ndeshjet e fundit, mjafton të përmendim asistet e fundit. Na duhet të përforcohemi në sulm.
Daja ka refuzuar lojtarë në merkato? Puna e përditshme në një kohë merkatoje është që shohim shumë lojtarë, ia kemi prezantuar trajnerit dhe pastaj shohim se sa përshtaten me vizionin e trajnerit. Ka qenë e vërtetë që nuk kemi rënë dakord për elementë të ndryshëm. Kjo është si të thuash që mund të kishim marrë 10 lojtarë që mund të bënin keq. Jam i bindur që Junior është ndër më të mirët në Shqipëri. Cara dhe Mala janë në krah me shumë vlerë. Por, ai tipi i lojtarit pykë s’është në preferencat e lojës tonë në përgjithësi. Mund të afrojmë një futbollist për ndeshje të ndryshme kur skuadrat mbyllen shumë pas.
Në 10 gola të pësuar, 5 i kemi dhuruar. Ndodh në një ndeshje, por jo 5 apo 6 ndeshje brenda një faze. Goli i pësuar nga Skënderbeu ndodhi prap për shkak të një gabimi”, tha ai.
Loading ...
