Një tjetër lojtar kuqezi firmos me Peskarën

Leonard Maloku ka firmosur me Peskarën. Pas Ledian Memushajt, skuadrës italiane iu bashkua dhe Rei Manaj, ndërsa ditën e sotme edhe i riu Maloku është bashkuar me dy shqiptarët e tjerë.

Ai është 18 vjeç dhe luan për kuqezinjtë e U-17, si mbrojtës i djathtë. Maloku është prodhim i akademisë se Peskarës dhe vetëm vitin e kaluar iu bashkua Primaverës, ndërsa sivjet pritet të debutojë me ekipin e parë.

18-vjeçari ka bërë një paraqitje të shkëlqyer sezonin e shkuar, duke bërë që Masimo Odo ta grumbullojë në ekipin e parë.

Tashmë trajneri i skuadrës italiane ka zgjidhur një problem të rëndësishëm, pasi Maloku përpos mbrojtësit të djathtë, mund të bëjë fare mirë edhe qendërmbrojtësin. Në këtë mënyrë Peskara ka siguruar një futbollist me shumë vlera, që do t’i bëjë mjaft punë në të ardhmen.