Nje rrëfim special nga Shkodra, si u krijuan Vllaznit dhe një mesazh për t’u mbajtur mend gjatë…

Si shumë ekipe në Shqipëri, edhe Vllaznia ka tifogrupin e saj ultras që quhet “Vllaznit Ultras”. Ky tifogrup mund të mos jetë shumë i madh në numër, por ka shumë histori në vetvete dhe gjithnjë është i pranishëm për t’i dhënë zemër skuadrës shkodrane, edhe atëherë kur gjithë sportdashësit i lënë bosh shkallët e stadiumit.

Në një prononcim për newsport.al, drejtuesit e “Vllaznit Ultras” kanë treguar historinë e grupit që nga fillimet e tij, të cilën shumë pak veta e njohin, dhe peripecitë e hasura në ditët e sotme, kur ekipi i Vllaznisë nuk po kalon një gjendje të mirë.

– Pse emri “Vllaznit Ultras”?

– Mes disa propozimesh u vendos emri “Vllaznit Ultras” si më origjinali, i cili na përshtatet më së miri me historinë e themelimit të ekipit tonë të zemrës, Vllaznia. Gjithashtu dhe vetë mentaliteti ultras të shtyn për të qënë sa më të lidhur në tribunë mes njeri-tjetrit, me pak fjalë jemi Vllazën në tribunë dhe jashtë saj. Por si veçorinë më karakteristike me të cilën krenohemi është logoja e tifogrupit, një logo origjinale e punuar me tepër përkushtim dhe jo e kopjuar siç i kanë disa tifogrupe shqiptare fatkeqësisht.

– Kur ka nisur aktivitetin tifogrupi dhe e kujt ka qënë ideja?

– Tifogrupi ka nisur rrugëtimin në datën 19 Dhjetor 2005, si tifogrupi i parë ultras në Republikën e Shqipërisë. Iniciativa për ristrukturimin e tifozerisë shkodrane duke parë nevojën për mbështetjen e ekipit sipas mentalitetit ultras ishte e Zamir Beqirit dhe Tut Rrahmanit. Rolin kryesor e mbajti Zamiri dhe disa djem të rinj të cilët përveç organizimit, futen në tifoskenën shqiptare shumë këngë të reja, një nga të cilat sot këndohet nga të gjitha tifogrupet shqiptare, e famshmja “kush s’kërcen…”

– Sa anëtarë kanë “Vllaznit Ultras”?

– Grupi ka rreth 200 anëtarë, por problem është aktivizimi, jo të gjithë janë aktiv në tribune. Një problem i madh shtohet dhe nga gjendja jo e mirë e skuadrës së futbollit, jo vetëm këto vite por që nga viti 2001 ku Vllaznia fitoi kampionatin e fundit. Pra, brezi i ri nuk është gëzuar asnjëherë ta shikojë Vllazninë kampione. Kjo e vështirëson edhe punën tonë me anëtarsimet, nëqoftëse mund ta quajmë “punë”.

– Çfarë keni për t’u thënë publikisht tifozëve të Vllaznisë?

– Tifozët e Vllaznisë duhet të kuptojnë që ekipi nuk mbështetet vetëm me pjesëmarrjen në shkallët e stadiumit. Jo, kjo nuk është e mjaftueshme. Tifozët duhet të bashkohen me “Vllaznit Ultras”, ta mbështesim ekipin tonë të zemrës duke bërë tifo 90 minuta sipas mentalitetit ultras. Sa më të shumtë në numër, aq më shumë do të dëgjohet zëri i tifozëve kundrejt padrejtësive, abuzimit dhe përfitimit të atyre që po drejtojnë Vllazninë ndër vite.