Partizani dhe Kastrioti kanë barazuar 0-0 për javën e 17 të Superligës. Ndeshja e zhvilluar në “Elbasan Arena” nuk ka qenë e duhura për të kuqtë, që në shtëpi nuk kanë mposhtur krutanët. Edhe pse në vendin e fundit, të besuarit e Çelës kanë treguar se janë “kockë e fortë”, duke marrë pikë.
Suksesi i dytë për trajnerin e krutanëve, që pas fitores me Teutën ndal edhe Partizanin. Nuk mund të thuhet e njëjta gjë për Mehmetin, që ka punë për të bërë paçka rasteve të krijuara.
Pas 17 ndeshjeve, Partizani mban vendin e pestë me 22 pikë, ndërsa krutanët janë të fundit me 12 pikë.
Pas ndeshjes për Gol pas Goli foli trajneri i Partizanit, Dritan Mehmeti.
“E dinim që Kastrioti do të na kapte në kundërsulme. Skuadra duhet të ishte e qetë në 20 metrat e fundit dhe kemi vuajtur shumë në pasimin final. Nuk ishim të qetë që të godisnim portën në pjesën e dytë. Skuka është një lojtar me cilësi mjaft të mirë, ky është sezoni i parë që luan në Superligë dhe nuk ka shumë eksperiencë që të vendoset siç duhet. Skuadrës i mungon qetësia pasi rezultatet do të vijnë. Nuk thashë tension, por nuk kishim qetësi pasi ndryshon tensioni nga qetësia. E kemi mbajtur kundërshtarin në gjysmëfushën e tyre, por duhen lojtarë efikas brenda zonës”.
Dëmtimi i Bitrit? “Duhet të kemi parasysh që me të tillë kundërshtar dhe me një zëvendësim të detyruar, ndryshojnë gjërat pasi kishim punuar me Bitrin. Skuka dhe Kallaku janë rishtazi tani dhe duhet të përshtaten me skuadrën. Nuk është e lehtë kur në merkaton e janar ke 3 afrime dhe prishet manovra. Nuk ka justifik, sot duhet ishim më shumë agreziv për të fituar ndeshjen”.
Merkato dhe çështja Dërvishi? “Ne presim dhe jemi në kontakte për një sulmues dhe një mesfushor e me këto dy afrime do ta mbyllim merkaton. E kemi të nevojshme të afrojmë dy lojtarë pasi kjo gjë u pa edhe sot. Jam përgjegjës për skuadrën dhe duhen pyetur drejtuesit për çështjen Dervishi”, u shpreh trajneri Mehmeti.