Teuta mori një fitore të thellë 4-0 ndaj Bylisit në shtëpi. Durrsakët me këtë 3 pikësh morën sërish vendin e parë në Superligë duke lënë pas Partizanin. I ftuar në emisionin “Rubrika Sportive”, mbrojtësi Rustem Hoxha u shpreh tepër i lumtur me këtë arrije, ndërsa zbuloi edhe gjendjen e kapitenit Arapi që mungoi për shkak dëmtimi.
“Ndeshjet në shtëpi? Është e vërtetë që kemi lënë shumë pikë brenda, por edhe për faktin se kundërshtarët na rrinin mbrapa shumë. Ndërsa tani po tendojnë me dalë më shumë në sulm, lejnë edhe hapësira, ne e kemi shfrytëzuar më mirë këtë pjesë”.
“Sfida me Partizanin? Mendoj që kjo javë është shumë e rëndësishme, sidomos për ne nëse do arrijmë të dalim me një fitore nga stadium i Kamzës (ndeshja me Kastriotin), besoj se kemi hedhur një hap shumë të rëndësishëm drejt objektivit. Sigurisht që edhe ndeshja me Partizanin do jetë si një finale, sepse janë dy ekipe pretendente. Të krijojmë mundësinë që të luajmë për dy rezultate në shtëpi kundër të kuqve”.
“Kemi një grup të bashkuar, djem të rinj të talentuar me lojtarë me eksperiencë, që i ndihmojnë shumë. Besoj se kjo është një plus i madh. Atmosfera është shumë pozitive, gjithmonë kështu ka qënë, edhe kur kemi patur rezultate jot ë mira. Për fatin tonë të mirë kemi dhe një president që nuk na fut në trysni”.
“Oshilacionet? Është një kampionat shumë i vështirë, diferencat nuk janë shumë të mëdha. Të gjithë ekipet kanë patur këtë luhatje në rezultate, ashtu si ne. Shpresoj që ti kemi lënë mbrapa këto luhatje dhe të vazhdojmë me fitoret. Ndeshjet që më kanë mbetur peng? Janë këto ndeshjet brenda që kemi lënë pikë. Me Kastriotin kemi lënë pikë në dy ndeshje, me Skënderbeun po ashtu. Janë ndeshje që duhet ti fitosh”.
“Ndeshja me Kastriotin? Nuk frikësohemi, por duhet thënë që Kastrioti ka një ekip të mirë, luftën e fortë sportive e kanë pikën e tyre të fortë. Janë në pozita jo të mira, kështu që ne duhet ta shfrytëzojmë. Duhet të jemi të kujdesshëm dhe të menaxhojmë mirë trysninë që kanë ata”.
“Sulmuesi më i vështirë? Është Seferi, lëviz shumë, edhe pas shpine, që është e vështirë për mbrojtësit. Na ka hapur punë, por ia kemi dalë me sukses”.
“Jemi shumë të lumtur që morëm kryesimin, por duhet të qëndrojmë me këmbë në tokë, sepse nuk është ndojë diferencë e madhe, një pik larg jemi, ndeshjet vijnë shumë shpejt dhe duhet të qëndrojmë me këmbë në tokë. Gjendja e Arapit? Është e mirë, po meret fizioterapisti me të, shpresojmë që ta kemi gati për ndeshjen me Partizanin”.
“Ndeshje e lehtë me Bylisin? Rezultati këtë tregon, por ishte shumë e vështirë. Nëse nuk do shënonim aq shpejt, do të bëhej akoma më e vështirë, sepse edhe trysnia për të shënuar gol vjen dhe rritet. Por për fatin tonë të mirë arritëm të shënonim shpejt, e menaxhuam mirë rezultatin, më pas erdhën dhe golat e tjerë që na e lehtësuan punën”, u shpreh Hoxha.
Loading ...
