Napoli është duke kaluar një situatë të vështirë. Trajneri Ançeloti dhe lojtarët kanë dalë kundër vendimit të De Laurentis që kërkoi grumbullim të ekipit pas paraqitjeve të dobëta. Një situatë e vështirë është edhe me tifozët, të cilët kanë protestuar ndaj lojtarëve, duke iu drejtuar edhe me termin “mercenarë”.
Në kampin e të kaltërve gjithçka ndodh për shkak të rezultateve jo të mira, barazimi dhe loja e dobët në Champions, duket se i hodhën më shumë benzinë zjarrit. Në këto kushte, siç raportohet në mediat Apenine, presidenti po sheh mundësinë e shkarkimit të trajnerit dhe afrimin në ekip të një njeriu me pagë më të ulët.
Gjithmonë sipas mediave në Itali, një opsion i mirë për stolin do të ishte edhe Giovanni De Biassi, ish trajneri që çoi Kombëtaren kuqezi në Euro 2016. De Biassi është përfolur shpeshherë për të drejtuar një ekip në Serinë A, por pa pasur diçka konkrete. Situata e Napolit, mund t’i japë një dorë teknikut italian.