Shpëtim Moçka është portieri vlonjat që u aktivizua sezonin e fundit me Teutën. Ai mbetet pjesë e durrsakëve, por kontrata e tij është me një tjetër skuadër në Shqipëri. Pas largimit nga Mamurrasi, ai firmosi në Laç, por nuk gjeti hapësira aktivizimi dhe u dha në huazim në Durrës te Teuta.
Lojtari mbetet ende në kontratë me Laçin, ndërsa presidenti Pashka Laska i ka dhënë liri vetëm për aktivizimin te Teuta. Portieri nuk mund të aktivizohet në asnjë skuadër tjetër gjatë sezonit të ri, pasi përgjigja e Laskës ka qenë ultimatum për të.
Për vet faktin se ai ka shkëlqyer me Teutën, ka rënë në syrin e shumë skuadrave elitare në vend, ndërsa dëshirën parësore për ta pasur në ekip e ka shprehur Kukësi. Por, kjo situatë nuk është pranuar nga presidenti Laska, edhe pse portieri ka pasur dëshirë që t’iu bashkohet verilindorëve.
Kështu, vlonjati Moçka mbetet “i burgosur” për shkak të kontratës, ndërsa është i detyruar të luajë edhe për një vit në Durrës në saj të kontratës së dhënies në huazim nga Laçi te Teuta.