Pas seancës së paradites që u zhvillua me dyer të mbyllyra, pasditen e kësaj të mërkure, kombëtarja Shqiptare zhvilloi seancën e rradhës stërvitore në resortin Tropikal në Durrës, me trajnerin Gianni De Biasi që këtë herë lejoi për rreth 10 minuta praninë e mediave në fushën stërvitore.
Mëngjesin e të enjtes përfaqësuesja kuqezi do të zhvillojë edhe stërvitjen e fundit në tokën shqiptare përpara nisjes për në Itali ku të Premten në orën 20.45 në Renzo Barbera të Palermos, Shqipëria do të ketë përballë përfaqësusen e kaltër, në një duel që pritet të sjellë emocione të mëdha te të gjithë shqiptarët. Asnjë risi në stërvitjen e pasdites.
I gjithë grupi i futbollistëve ishte i gatshëm dhe u vendos në dispozicion të trajnerit De Biasi, përfshirë këtu edhe Amir Abrashin e Jahmir Hykën. Mesfushori i Freiburgut i cili shqetësoi stafin teknik një ditë më parë, nuk ka asgjë serioze dhe do të jetë gati për sfidën ndaj Italisë. U stërvit me grupin edhe Jahmir Hyka.
Mesfushori me tipare sulmuese u shfaq më i relaksuar me Hykën që e kishte hedhur pas krahëve lodhjen e akumuluar gjatë 2 ditëve të fundit për shkak udhëtimit nga Amerika drejt Shqipërisë dhe pritjes së stërgjatur në aeroportin e Romës.
Stërvitja e pasdites nisi me disa vrapime të lehta për të kaluar më pas te ushtrimet me topin. Mbështetja e tifozëve në shkallët e stadiumit do të jetë shumë e rëndësishme për kuqezinjtë e Gianni De Biasit në sfidën e Renzo Barberas.
Nga burimet e Supersport, mësohet se në Palermo, mbrëmjen të Premtes pritet të jenë rreth 15 mijë tifozë shqiptarë, pasi përvec 5000 biletave të vëna në dispozicion nga federata italiane e futbollit, për tifozët kuqezinj, pritet që edhe 10 mijë shqiptarë të tjerë të cilët zotërojnë nënshtesinë italiane të mbështesin kombëtaren në këtë sfidë kaq të rëndësishme.
Loading ...
