Futbollisti i Kombëtares shqiptare Eros Grezda ka folur së fundmi në lidhje me sezonin e tij të ri te Osijek në Kroaci, si dhe ndeshjet e ardhshme të kuqezinjve në Ligën e Kombeve.
Në një prononcim për Supersport, Grezda ka komentuar rikthimin e tij pas periudhës së riaftësimit nga dëmtimi që kishte pësuar, si dhe ka folur edhe për gjendjen e përfaqësueses dhe situatën e dëmtimeve që po kalon.
23-vjeçari është shprehur i bindur se ekipi nuk do ndikohet shumë nga mungesat e Roshit dhe Sadikut, pasi ka shumë lojtarë të tjerë të gatshëm për të kontribuuar për Kombëtaren. Gjithashtu në aspektin personal Grezda u shpreh i bindur se do të jap maksimumin, dhe se trajneri Panuçi do ta grumbulloj për sfidën ndaj Izraelit nëse do ta shohi të arsyeshme.
"Kalova një fazë rekuperimi mjaft të vështirë, por javën e ardhshme do të luaj ndeshjen e parë të sezonit ku pretendojmë të fitojmë kampionatin. Kombëtarja nuk varet vetëm nga një ose dy lojtarë. Më vjen shumë keq për Roshin dhe Sadikun që nuk do jenë, por jam i bindur se Panuçi do bëjë zgjedhjet e duhura. Kemi shumë lojtarë të tjerë të gatshëm për të kontribuuar për ekipin. Unë do të jap maksimumin, kam folur dhe me trajnerin dhe nëse ai do ta shohi të arsyeshme do të më grumbullojë për ndeshjen e rradhës", ishin fjalët e Grezdës.
