Futbollistja kosovare Fatmira Alushi, e cila mbajti veshur fanellën e kombëtares gjermane, i ka dhënë fund dje karrierës sportive në moshën 28-vjeçare. Mesfushorja nga Istogu e ka njoftuar tërheqjen nga futbolli nëpërmjet një postimi në rrjetin social “Facebook”. Ajo u shpreh se ka zgjedhur që, tani e tutje, t’i përkushtohet familjes.
“Pas një mendimi të gjatë dhe të kujdesshëm, unë kam vendosur të përfundoj karrierën e futbollit. Ky vendim është shumë i vështirë për mua, sepse me gjithë qejf kam dashur të luaj futboll në një klub atraktiv. Për fat të keq nuk ishte e mundur të gjenim një qytet ku unë dhe burri im Enisi të ishim në gjendje të realizojmë planet tona private dhe sportive.
Prandaj kam vendosur që t’i dedikohem familjes sime. E adhuroj faktin që jam nënë dhe të shikoj djalin tim sesi rritet përditë, çka nuk do të ishte e mundur nëse do të vazhdoja karrierën time si futbolliste. Dua t’i falënderoj të gjithë për mbështetjen që më kanë dhënë në të gjithë këto vite.
Futbolli do të jetë gjithmonë një pjesë e madhe dhe e rëndësishme në jetën time dhe besoj se do të shihemi prapë dikur. Shumë faleminderit, keni qenë të mrekullueshëm!”, ishte njoftimi i ish-futbollistes Alushi.
Loading ...
