Lajmi i fundit/ Vllaznia i bën presion FSHF-së, klubi shkodran: Shpresojmë të mos përsëritet sërish skenari i Enea Jorgjit

Nesër, Vllaznia do të luajë kundër Teutës në kuadër të javës së 26-të të Superiores. Për këtë takim skuadra shkodrane do të kërkojë të marrë një rezultat pozitiv, megjithatë të njëjtin objektiv ka edhe Teuta. Por një ditë para ndeshjes, klubi shkodran ka dalë në deklaratë zyrtare ku bën thirrje që gjykimi të jetë korrekt dhe të mos përsëritet edhe njëherë historia si në eliminimin në Kupën e Shqipërisë.
” Ndeshja e nesërme ndaj Teutës siç e kemi thënë gjatë gjithë këtyre ditëve, konsiderohet shumë e rëndësishme për ekipin tonë. Për këtë arsye, përderisa në përballjen e fundit me këtë ekip, KF Vllaznia ka një histori aspak të këndshme, shpresojmë shumë që të mos përsëritet skenari i eliminimit tonë në kupë pikërisht nga gjykimi skandaloz i Enea Jorgjit në atë ndeshje. Ne kërkojmë arbitrim të drejtë dhe korrekt në këtë takim dhe në fushë le të fitoje ekipi më i mirë. Ecuria e këtij sezoni ka treguar se Vllaznia është ndëshkuar nga arbitrimet jo vetëm në ndeshjen e kupës me Teutën, por edhe në disa ndeshje të tjera si ato me Partizanin, Kukësin, Flamurtarin dhe ndonjë tjetër. Për të gjitha këto, ne shpresojmë që nesër të jetë çdo gjë korrekte në fushën e lojës”, shkruhej në deklaratën e Vllaznisë.