Nuk mund të ishin më krenarë se kaq për fëmijët e tyre, teksa i shohin të përfaqësojnë Kosovën në Lojërat Olimpike dhe të ngrenë lart flamurin e shtetit të tyre.
Janë prindërit e Nora dhe Akil Gjakovës, të cilët nuk mund ta fshehin gëzimin dhe krenarinë kur flasin para kamerës për arritjet e fëmijëve të tyre. Akili nuk mundi të shkonte më shumë se vendi i 7-të, por Nora ia doli të fitonte medaljen e artë, duke bërë krenarë gjithë shqiptarët kudo që ndodhen.
Të rritur me sakrifica dhe vështirësi, Nora dhe Akil Gjakova janë shembujt më të mirë se si me punë mund të arrihet gjithçka. Nëna e dy xhudistëve thotë se ka qëndruar zgjuar gjithë natën për të parë ndeshjet e fëmijëve të saj.
"Gjithë natën kemi qëndruar zgjuar duke pritur Akilin, më pas edhe Norën. Medalja e Norës n aka gëzuar shumë, Akili u rendit i shtati, natyrisht nuk është pak. Norës i është realizuar ëndrra e saj, është pa fjalë si çdo herë dhe ia ka arrit me fitu. I kam përcjell të gjitha përballjet e Norës, më kanë pëlqyer shumë", u shpreh Elvana, nëna e dy xhudistëve kosovarë.
Luani, babai i Norës dhe Akilit tha se është shumë i gëzuar, aq sa nuk mund ta shprehë me fjalë.
"Është një ndjenjë e veçantë, një gëzim që nuk mund ta shpreh, nuk e kemi prit këtë fitore.
Nora ka qenë e lënduar, ka pas operacione, por është rikthyer e fortë. Në olimpiadën e kaluar ka shkuar me lëndim dhe i është dashtë që të tërhiqet, por me angazhimin e saj dhe me mundin ia ka dale. Ne kemi edhe vajzën e vogël që stërvit xhudo dhe tani kemi tre fëmijë që janë në xhudo. Akili ka pas kundërshtarë më të vështirë, mirëpo do ta ketë kohën e tij dhe në të ardhmen do të triumfojë", ka thënë ai.
Lexo gjithashtu
