Solidariteti për fatkeqësinë natyrore që përfshiu Shqipërinë këto dy ditë ende vijon. Të shumta kanë qenë ndihmat material në drejtim të të prekurve. Së fundmi është klubi I futbollit Shkupi që militon në elitën e Maqedonisë së Veriut, që ka dhuruar 10 mijë euro për të prekurit në Durrës. Shqiptarët e skuadrës në shtetin fqinj, janë solidarizuar kështu me fatkeqësinë natyrore në vendin tonë.
“Pas mbledhjes së zhvilluar të këshillit drejtues të klubit, është marrë vendim që së bashku me paratë e tubuara nga biletat dhe një shumë tjetër e konsiderueshme shtesë të kompletohen plotë 10 mijë euro për donacion drejt qytetit të Durrësit që u kamplua nga katastrofa natyrore ditën e djeshme, ku mbetën shumë njerëz të vdekur dhe shumë të tjerë të plagosur”, komunikon faqja zyrtare e shkupianëve. Kjo iniciativë bëhet së bashku me Komunën e Çairit dhe tifo grupin “Shvercerat”.
