Përgjithësisht në futboll, pretendentët i shohin ekipet e vogla si statistikë. Kundërshtarë që vlejnë tre pikë në garën drejt objektivave sezonale. Por, ka raste kur të mëdhatë i kthejnë sytë nga këto skuadra, me shpresën se në mëyrë indirekte do të marrin një ndihmë. Kështu ka ndodhur edhe me Korabin, që është në lupën e rivalëve për titullin. Megjithatë, kapiteni i dibranëve, Sokol Mziu, thotë se Korabi luan vetëm për veten dhe nuk mendon të bëjë ndere.
Sokol Mziu: Ne nuk luajmë për askënd tjetër, ne luajmë për Korabin. Të tregojmë forcën dhe karakterin tonë. Ne nuk bëjmë ndere, por do të luajmë për vete.
Me barazimin ndaj Tiranës, skuadra e Gerd Haxhiut u kthye te rezultatet pozitive pas pesë humbjeve radhazi. Kapiteni Mziu premton luftë deri në fund, pavarësisht shanseve minimale për të mbijetuar në Kategorinë Superiore.
Sokol Mziu: Ne do të vazhdojmë të luftojmë. Këtë e treguam që prej ndeshjes me Tiranën që morrëm pikë. Të gjitha ndeshjet do t’i marrim me radhë. Ne do të luftojmë deri në fund, për aq kohë sa matematika na e lejon. Pastaj, çfarë të jetë risk. Nëse marrim pikë mund të ngrihemi në renditje, në të kundërt do të qëndrojmë në fundin e klasifikimit.
Të shtunën dibranët luajnë në trasfertën me Kukësin. Një përballje ku ashtu si në fazën e dytë, te Korabi kërkojnë të bëjnë surprizën përballë kryesuesve të kampionatit.
Sokol Mziu: E dimë të gjithë forcën e Kukësit, por fazën e kaluar arritëm të merrnim pikë brenda në Kukës, pavarësisht se Korabi luante si skuadër pritëse. Do ikim të luajmë, për të treguar sërish veten ashtu si ndaj Tiranës. Përse jo? Ne e treguam fazën e kaluar, që mund ti merrnim pikë, madje edhe të fitonim. Përse të mos e tentojmë sërish”, deklaroi Mziu për Supersport.
Loading ...
