Tome Kitanovski mund të jetë futbollisti i ri i Shkupit. Klubi nga Maqedonia e Veriut do marrë pjesë në kupat e Europës, teksa u rendit në vendin e dytë pas Shkëndijës kampione, raporton newsport.al. Klubi shqiptar kërkon të përfaqësohet denjësisht, teksa mediet vendase bëjnë me dije se 29 vjeçari Kitanovski është gati për të firmosur me bardheblutë.
Lojtari vjen nga një eksperiencë me Makedonija GP, duke zhvilluar një sezon e gjysmë. Mbrojtësi i djathtë aktivizohet edhe në mesfushë, teksa për gjashtë muaj në sezonin 2019-20 ka qenë pjesë e Kukësit në Kategorinë Superiore. Me Kukësin ai zhvilloi 13 ndeshje, ndërsa këtë sezon ka luajtur në 29 takime duke dhënë 6 asiste. Pas firmës me Fisnik Zuka, Shkupi duket se do përmbyllë marrëveshjen edhe me Kitanovskin.
