Vllaznia barazoi 1-1 me Universitatea Craiova në “Loro Boriçi”. Në një stadium me mbi 10 mijë tifozë, shkodranët ditën të tregojnë cilësitë në turin e dytë të Conference League.
Ndeshja nisi mirë për miqtë, që fituan disi terren në fushë. Me kalimin e minutave kuqeblutë ia dolën të balanconin lojën, duke pasur disa raste por pa konkretizuar.
Do duhej minuta e fundit e pjesës së parë, kur arbitri irlandez Mclaughlin do jepte një penallti bujare për Craiova, me Ivan që do e ndalte në rrjetë, paçka se Zogovic kuptoi krahun.
Në pjesën e dytë trajneri Josa diti të lëvizë “gurët”, duke hedhur në fushë Markun dhe Hoxhaj. Do ishte kjo dyshe që në të 51 minutë do vendoste ekuilibrat, me Markun që bëri kamerierin për Hoxhaj.
Pjesa e mbetur e lojës kishte raste për të dyja skuadrat, me 90 minutat e para që u mbyllën 1-1. Tanimë fokusi i Vllaznisë do jetë një javë më vonë në Craiova, në transfertën rumune të kthimit.
Pas ndeshjes për mediet foli edhe presidenti i Vllaznisë, Alban Xhaferi.
“Dua të falenderoj tifozerinë e zjarrtë shkodrane, e treguan se janë më të mirët në botë. Kanë bërë një tifozllëk por edhe sjellje fantastike. Falenderoj edhe policinë e Shkodrës që kanë bërë një punë të mirë. Të gjitha institucionet, policinë, spitalin, zjarrfikësit.
Ndeshja – Ka qenë një ndeshje e vuajtur, vinim nga mos eksperienca dhe e dinim një gjë të tillë. Ajo që donim u arrrit dhe do bëjmë mirë në ndeshjen që vjen në Rumani.
Organizimi – Kemi një javë që duam të japim këtë model dhe duam ta ndjekim. Kemi edhe ndihmën e Bashkisë, ka luajtur edhe kombëtarja dhe s’ka pasur incidente. Ta përqafojnë edhe ekipet e tjera këtë model.
Barazimi – Do ishte më mirë të fitonim, por ndeshja shkoi mirë. E quaj rezultat të mirë, kemi bërë ndeshje të mirë. Gjithçka është e mundur, me punën tonë dhe ndihmën e Zotit kualifikohemi.
Tifozët – Kemi bërë ekip të mirë, ndërhymë ku kishim nevojë. Trajneri ka skemat e veta dhe do jemi kompetitivë. Duam mbështetje nga tifozët. Kjo është në përqindje më të madhe Vllaznia e sezonit të ri”, tha Alban Xhaferi.
Lexo gjithashtu
