Flamurtari duket se ka startuar ashtu siç ishte parashikuar nga thuajse të gjithë këtë edicion të ri futbollistik. Me emërimin e Ilir Dajës së krye të skuadrës, vlonjatët bërën shumë lëvizje në merkato, si në hyrje ashtu dhe në dalje.
Merkatoja ka dhënë rezultatet e para dhe në dy javët e para të kampionatit, skuadra e drejtuar nga Ilir Daja ka mundur të grumbullojë katër pikë. Barazimi pa gola ndaj Teutës dhe fitorja 1-0 ndaj Kukësit në javën e dytë të kampionatit iu ka dhënë krahë vlonjatëve.
Në javën e tretë të kampionatit, Flamurtari do të provojë forcën ndaj Luftëtarit që ndodhet në vendin e fundit në tabelën e renditjes edhe pse kanë kaluar vetëm dy javë kampionat, me zero pikë. Daja duhet të bëjë çmos të marrë pikë të plotë në këtë sfidë për të pritur i qetë ish-skuadrën e tij, Skënderbeun.
Java e katërt e kampionatit i rezervon një ndeshje të veçantë ish-trajnerit të korçarëve, atë me Skënderbeun. Sfidë delikate dhe ndeshje "nderi", pasi Daja do përballet me ish-skuadrën që ka drejtuar edicionin e fundit, të cilën e ka marrë në dorëzim Orges Shehi. Çfarë do ndodhë? Asgjë nuk është e parashikueshme, por ajo që parashikohet është një sfidë që do të dhurojë emocione dhe gola, ku përveç dy skuadrave më të mira, në fushë do zbresin përballë tyre profesori Ilir Daja dhe ish-nxënësi i tij Orges Shehi.
Lexo gjithashtu
