Të gjithë e kujtojnë takimin e luajtur dy vite më parë mes Shqipërisë dhe Izraelit në “Elbasan Arena”, ku kuqezinjtë u mundën me rezultatin e thellë 3-0. Në këtë përballje, ajo që mbeti në memorien e të gjithëve ishte kartoni i kuq që mori Etrit Berisha pas përplasjes që pati me lojtarin izraelit, Eran Zahavi.
Ky i fundit, në një intervistë të dhënë së fundmi për mediat vendase ka rikujtuar këtë moment dhe ka premtuar se nëse do të kthehej pas në kohë, nuk do ta bënte atë veprim dhe se lidhur me ngjarjen e ndodhur në “Elbasan Arena” dy vite më parë, ky i fundit ka kërkuar ndjesë ndaj Berishës edhe pse këtë gjë ai nuk e ka bërë publikisht.
“Unë kërkova falje menjëherë pas ndeshjes, por jo para të gjithëve. Gjërat nuk shkuan edhe aq mirë herën e fundit që më intervistuat. U thanë disa fjalë që nuk harrohen lehtë, por ne jemi këtu që të nisim një rrugëtim të ri. Erdhëm këtu që të bëjmë më të mirën për ekipin. Nuk jam egoist, kërkoj ndjesë për atë që ndodhi. Ajo pasdite nuk mund të ishte fundi im në ekipin kombëtar. Pres një të ardhme më të mirë nga tani e tutje. Që në bisedën me menaxherin vendosëm të linim gjithçka menjëherë pas krahëve. Ajo që mësova nga kjo gjë është që herën tjetër nuk do t’ia dalë askush të më çekuilibrojë. Nuk jam më kapiteni, por nëse më japin shiritin, gjëra të tilla nuk do të përsëriten”.
Loading ...
