Klubi i Skënderbeut ka reaguar ashpër pas sulmit që autobuzi i ekipit pësoi nga disa tifozë mbrëmjen e djeshme pasi kishte mbaruar ndeshja përballë Tiranës. Korçarët, në një postim të bërë në faqen e tyre në "Facebook", kanë kërkuar që autorët e sulmit të vihen para përgjegjësisë dhe në ndeshjet e ardhshme forcat e rendit të marrin më mirë masat për të mbrojtur skuadrën dhe tifozët.
“Duke marrë shkas nga sulmi i ndodhur pas ndeshjes ndaj Tiranës dëshirojmë të reagojmë dhe të dënojmë ashpër për të disatën herë sulmet e vazhdueshme ndaj mjeteve tona të transportit. Paaftësi dhe organizim i dobët i forcave të rendit për të disatën herë. Kjo situatë duhet të marrë fund. Ti jepet rëndësi maksimale shoqërimit të ekipit dhe tifozëve nga policia deri në dalje. Nuk ka asnjë precedent të mëparshëm ku autobuzi i ekipit shoqërohet bashkë me autobuzat e tifozëve.
Pasojat i keni në foto. Dy sulme të njëpasnjëshme. Një në afërsi të stadiumit dhe një në dalje të kryeqytetit në prani të forcave të rendit. Ne si klub kërkojmë të gjenden autorët e kësaj ngjarje dhe të vendosen para përgjegjësisë penale si dhe të merren masat e duhura nga policia për të shoqëruar ekipin dhe tifozët në transfertat e ardhshme. Kjo situatë po bëhet e padurueshme.”
Lexo gjithashtu
