Flamurtari i djegur nga buja, injoron “big”-ët

Të djegur nga merkatoja e bujshme e dy viteve të fundit, ku emrat e mëdhenj të afruar te Flamurtari nuk kanë prodhuar asgjë, por vetëm kanë marrë lekët dhe kanë ikur, drejtuesit e klubit kanë vendosur të ndryshojnë strategji. Ata do të afrojnë pak lojtarë me përvojë dhe kualitet nga Superliga apo jashtë vendit, ndërkohë që një vëmendje të madhe do t’u kushtojnë të rinjve dhe jo vetëm atyre vlonjatë. Kjo është dhe filozofia e trajnerit të Flamurtarit, Gugash Maganit, i cili ka vëzhguar disa të rinj të ekipeve të moshave në Vlorë, por të tjerë të rinj do të vijnë edhe nga Tirana dhe qytete të tjera. Nga data 27 qershor deri më 4 korrik, stafi teknik do të merret me këtë fazë seleksionimi, duke zgjedhur të rinjtë më premtues.