Shkëndija u shpall zyrtarisht kampione në Maqedoninë e Veriut. Ekipi shqiptar bëri një sezon fantastik, duke e kurorëzuar edicionin futbollistik me këtë trofe. I pranishëm në Tetovë në takimin e fundit të kampionatit me Shkupin në fundjavë ishte Kreu i Federatës shqiptare të Futbollit, Armand Duka. Duka përgëzon Shkëndijën për arritjen, duke theksuar se padyshim një meritë të veçantë ka edhe trajneri Ernest Gjoka, ndërsa i uron edhe një sukses në Europë.
"Jam i kënaqur që jam këtu në kurorëzimin e këtij aktiviteti të vështirë, për të gjithë futbollin e Maqedonisë së Veriut. Ka qënë një vit i vështirë dhe i veçantë. Jam i kënaqur që përfundoi mirë. Jam akoma më i kënaqur që një Klub shqiptar, për herë të katërt, shpallet kampion me meritë. Kjo tregon se puna po shpërblehet. Shkëndija është një nga Klubet më me strategji. Uroj që të kenë sukses edhe në Europë.
Dua t'i uroj suksese ekipeve shqiptare. Gjithashtu, dua të përgëzoj edhe Ernest Gjokën, që është produkt i shkollës shqiptare.Duhet të uroj edhe tifozët e Shkëndijës, edhe pse nuk kanë patur mundësi të jenë prezent.
Maqedonia në Euro 2020? Sukses i jashtëzakonshëm. Unë uroj dhe kam bindjen se kanë një ekip të mirë dhe jam i sigurt që do kenë rezultate të mira" - tha ai.
Lexo gjithashtu
