Ballkani i ka dhënë fund fazës përgatitore në Turqi. Është klubi nga Suhareka që përmes një njoftimi në kanalin zyrtar bën me dije fundin e përgatitjeve në Antalya.
Prej 2 javësh, kampionët e Kosovës ishin në shtetin turk duke marrë ngarkesën e duhur nga trajneri Ilir Daja. Gjithashtu u zhvilluan 3 takime miqësore duke i fituar të gjitha. Në lajmërimin e bërë në kanalin zyrtar thuhej:
“Ditën e sotme e përfunduam fazën përgatitore në Antalya të Turqisë e cila zgjati gjithsej 14 ditë.
Ekipi i udhëhequr nga trajneri Ilir Daja përveç stërvitjeve zhvilloi 3 ndeshje miqësore që u mbyllën me fitore nga portokall e zinjët, e po ashtu gjatë kësaj faze u mbajt edhe ndeshja e Superkupës së Kosovës 2021/2022 të cilën e fituam.
Ne do të udhëtojmë për Kosovë sot dhe jemi të gatshëm për synimin e stinorit pranveror, të mbrojmë titullin kampion.
Na priftë e mbara Suharekë”.
