Një 22-vjeçar ka humbur jetën pas rrëzimit të tendës së kalçetos në zonën e “Urës së Gajdarit” në Sarandë. Policia bën me dije se i riu është transportuar menjëherë në spital, por fatkeqësisht për shkak të plagëve ka ndërruar jetë.
I riu, Amrando Kazma u godit nga hekurat e tendës së kalçetos dhe për pasojë nuk i mbijetoi plagëve të marra. Kujtojmë se Saranda u përfshi mbrëmjen e sotme nga era e fortë dhe shtrëngata me shi.
Informacioni i parë nga policia: “Sot, rreth orës 20:50, në vendin e quajtur “Ura e Gajdarit”, si pasojë e motit të përkeqësuar, është rrëzuar tenda mbrojtëse e një kalçetoje sportive dhe për pasojë është dëmtuar shtetasi A. K., rreth 22 vjeç, i cili është transportuar menjëherë në spital për ndihmë mjeksore.
“Informacion shtesë: Në vijim të informacionit paraprak për rrëzimin e tendës së një kalçetoje sportive, ku si pasojë u dëmtua shtetasi A. K., 22 vjeç, ju informojmë se si pasojë e dëmtimeve të marra, ky shtetas ndërroi jetë në spital. Grupi hetimor vijon punën për zbardhjen e plotë të rrethanave të ngjarjes”, njofton policia.
Loading ...
