Ka ndërruar jetë 60-vjeçari, i cili rreth një muaj më parë u plagos rëndë, pasi helikat e një gomoneje i kapën këmbët.
Alban Kukaviqi ndodhej me pushime në zonën e Shën Janit në Vlorë, ku një gomone gjatë ankorimit në molin e vjetër të ish-ushtrisë aksidentalisht me helikën e mjetit lundrues i ka dëmtuar këmbën 60-vjeçarit.
Fillimisht 60-vjeçari u dërgua në spitalin e Traumës, ndërsa më pas është dërguar për mjekim më të specializuar në Turqi, por që nuk ka arritur të mbijetojë.
Bëhet me dije se ish-basketbollisti ka ndërruar jetë gjatë operacionit të tretë që po i nënshtrohej. Për shkak se trupi i tij ishte i dobësuar, ai nuk ka arritur të mbante narkozën gjatë operacionit të tretë, ku do t’i vendosej një protezë në këmbë.
“Sot, në Karaburun, një mjet lundrues tip gomone, me drejtues shtetasin F. T., gjatë ankorimit në molin e vjetër të ish-ushtrisë në gjirin e “Shën Janit”, aksidentalisht me helikën e mjetit lundrues ka dëmtuar në këmbë shtetasin A. K., banues në Tiranë, i cili kishte zbritur nga një anije turistike në det afër këtij moli. (Nuk kemi të bëjmë me zonë plazhi)”, njoftoi Policia më 13 korrik.
Lajmin e hidhur e ka bërë me dije edhe Inspektorati Shtetëror i Punës dhe Shërbimeve Shoqërore, ku Kukaviqi punonte. Ata i kanë shprehur ngushëllime familjes për humbjen e madhe.
Lexo gjithashtu
