Në fundin e sezonit të shkuar, Flamurtari u përfshi nga një valë e gjerë ndryshimesh, të cilat pritet të sjellin reflektimin e këtij klubi në sezonin e ri që do të nisë në muajin shtator. Që nga ekipet e akademisë e deri në skuadrën e parë, kuqezinjtë kanë pësuar ndryshime të dukshme.
Përpos skuadrës së parë, e cila tashmë në krye ka Gugash Maganin, edhe në radhët e akademisë do të ketë ndryshime. Bëhet fjalë për kthimin në Vlorë të ish-sulmuesit të Tiranës, Elbasanit, Bylisit, Dinamos dhe Flamurtarit, Fjodor Xhafa.
Ky i fundit ka ushtruar në këtë klub profesionin e trajnerit në skuadrat zinxhir dy vite më parë, por vjet iu bashkua Apolonisë në postin e drejtorit sportiv. Largimi nga Apolonia bëri që drejtuesit vlonjat ta thërrasin dhe tashmë ai pret që të marrë drejtimin e akademisë vlonjate në mënyrë zyrtare.
Xhafa më parë ka ushtruar edhe detyrën e zëvendës trajnerit edhe te Bylisi, duke qenë pothuajse i kompletuar në këtë drejtim. Por, mosha dhe idetë e tij i japin një favorizim për të drejtuar më së miri akademinë e futbollit vlonjat, e cila ka nxjerrë breza të tërë lojtarësh të njohur. Burime për "newsport.al" bëjnë me dije se Xhafa pritet që të takohet me administratorin Idrizi për të përcaktuar zyrtarisht të ardhmen.
Lexo gjithashtu
