Mesazhet e urimit për xhudisten Distria Krasniqi, fituese të medaljes së artë në Lojërat Olimpike “Tokio 2020” nuk kishin si të mungonin as nga politikanët kosovarë.
Presidentja e vendit, Vjosa Osmani shkruan se Kosova do të krenohet me sportisten, e cila sot shkëlqeu para gjithë botës.
“Distria i solli Republikës sonë medaljen e dytë të artë olimpike. Nder e krenari e lumturi e papërshkrueshme. Ajo e ngriti sot flamurin e shtetit të saj në piedestalin më të lartë. Me suksesin e saj olimpik ajo nderoi një komb të tërë, si dhe e gëzoi fort çdo zemër në Kosovë por edhe shumë të tjera anë e mbanë botës. Distria, e para e botës, dëshmoi sot sërish se është e pamposhtur dhe se është krenaria e vendit tonë. Ajo dëshmoi që talenti dhe puna triumfojnë gjithnjë. Sot, nëpërmjet Distrias, Kosova shkëlqeu para tërë botës. Sot dhe përherë, Kosova do të krenohet me ty. Bravo!”-shkruan Osmani në statusin e saj.
Kryeministri i Kosovës, Albin Kurti e ka quajtur të artë, Distria Krasniqin, e cila triumfoi në kategorinë deri në 48 kilogramë.
“DISTRIA E ARTË, Në garën e parë në Lojërat Olimpike, Kosova fiton medaljen e artë. Faleminderit që po bëni krenar secilin prej nesh. Me zemër jam me ju në Tokio”, shkruan kryeministri Kurti në postimin e bërë në Facebook.
Loading ...
