Daniele Orsato ka qenë padyshim një nga arbitrat më në zë, jo vetëm në Itali, por edhe në Europë. 48-vjeçari vendosi të tërhiqej nga puna e tij edhe pse kishte oferta nga Rusia, për të punuar si ekspert në Federatën Ruse të Futbollit. Teksa në një intervistë të dhënë së fundmi për “La Repubblica”, Orsato ka treguar arsyen e refuzimit.
“Më kërkuan të bashkëpunoja me Federatën Ruse të Futbollit, por duke marrë parasysh situatën aktuale socio-politike dhe parimet e mia etike, vendosa të mos e pranoj”, tha fillimisht Orsato.
Më tej, ish-arbitri foli edhe për VAR-in, duke thënë se është i domosdoshëm për të reduktuar gabimet. Megjithatë, italiani shton se arbitrat e sotëm duhet të vendosin më shumë personalitet.
“VAR është i domosdoshëm për të reduktuar gabimet, por ne duhet të ndërtojmë një brez gjyqtarësh që dinë të vendosin personalitet, sepse sigurua ndonjëherë nuk është në imazhet që shfaq VAR. Megjithatë, do të doja një botë në të cilën të gjithë të kuptonin gabimet e arbitrit”, u shpreh më tej ish-arbitri.
Për ta mbyllur, Orsato u pyet për Interin, ekip që nuk e gjykoi që nga fundi i majit të vitit 2023. Sigurisht edhe për këtë, 48-vjeçari e kishte përgjigjen gati, duke thënë se nuk ishte ai që e vendoste.
“Unë i kam arbitruar të gjitha skuadrat, madje shumë herë. Disa shpesh, e disa të tjerë më pak. Por nuk isha unë ai që vendosja për ndeshjet që do të gjykoja”, mbylli fjalën e tij Daniele Orsato.
Lexo gjithashtu
