Kukësi ka kryer përgatitjen e parë pas mbërritjes nga Turqia. Ditën e sotme ekipi ka zbritur në fushë pas dy ditëve pushim të lëna nga klubi. Në fundin e stërvitjes trajneri i skuadrës Armando Cungu ka folur për "RTSH Sport". Numri një i pankinës kukësiane ka prekur disa tema, nga objektivi i klubit te çështja Rexhinaldo dhe te sulmi me dy lojtarë.
Objektivat? "Presidenti ynë është ambicioz. Unë besoj se është mëse normale që një president që investon rregullisht në klub, kërkon maksimumin nga ne. Unë e kam pranuar ofertën e Kukësit pikërisht për këtë gjë, pasi më pëlqejnë sfidat dhe rregullsitë. Kemi bërë një gjysmë të parë shumë të mirë dhe shpresoj të bëjmë edhe më mirë në të dytën.
Çështja Rexhinaldo? "Unë kam respektuar dhe respektoj punën e Rexhinaldos. Ka ndihmuar shumë skuadrën dhe synon të jetë zgjedhje e parë. Ai është pjesë e kombëtares dhe kërkon të luajë. Gjithsesi, unë do të bëj zgjidhjet më të mira në favor të klubit. Një profesionist, duhet të respektojë zgjedhjet e trajnerit.
Sulmi me dy lojtarë? "Nuk mund të flas para kohe, por për momentin, nuk e shoh një sulm me dy. Kemi shumë ndeshje në kampionat dhe në Kupë, prandaj të gjithë do të luajnë.
Teuta si rivale? "Teuta është kundërshtar i denjë për titull dhe nuk e heq aspak nga gara dhe është pretendente serioze. Paralelisht, ne do të bëjmë më të mirën edhe në Kupë, pavarësisht se fokusi ynë është kampionati.
Kupa? "Nuk është e lehtë që të luftojmë në dy fronte, jo vetëm ne, po çdo ekip. Gjithsesi, do të menaxhojmë në mënyrën më të mirë të mundshme skuadrën që të luftojmë për të dyja objektivat",- tha Cungu.
Lexo gjithashtu
