Oleksiy Sych ka siguruar ftesën e Ukrainës për herë të parë. Mesfushori u thirr në Kombëtare pas dëmtimit të Oleksandr Tymchyk, me këtë të fundit që u largua nga grumbullimi.
Sych do të ketë mundësinë të debutojë me ekipin A në sfidat që Ukraina do të luajë ndaj Gjeorgjisë dhe Shqipërisë. Lojtari i FC Rukh Lviv ka theksuar se është shumë i lumtur, ndërsa na zbuloi se si reagoi kur mësoi për ftesën e Ukrainës.
"Jam i pushtuar nga emocionet. Unë dhe gruaja ime po shikonim një serial kur mora një telefonatë në orët e vona të natës. Ishte drejtori ynë i përgjithshëm që më uroi për thirrjen në kombëtare. Isha i befasuar. Është një surprizë e madhe dhe jam shumë i lumtur që jam këtu.
Në fillim nuk e besova. Por kur trajneri dhe të tjerët filluan të më uronin, aty nisa ta besoja, duart më dridheshin. Thirrja e parë është një ndjenjë e pabesueshme.
U nisa nga Lviv në orën 10 të mëngjesit. Udhëtimi ishte i lodhshëm, por është një gjë e vogël. Gjëja kryesore është që unë jam këtu. Unë njoh shumë lojtarë nga ekipi olimpik dhe skuadra U-21.
Nazarenko dhe Brazhko, të cilët i njoh, më kanë dërguar tashmë mesazh. Jemi në kontakt. Prioriteti im është të shoh fitoren e ekipit në këto dy ndeshje. Nëse më jepet mundësia, jam i etur të kontribuoj në fushë”, ka deklaruar lojtari ukrainas.
Kujtojmë se Ukraina do të luajë 2 ndeshjet e fundit të Nations League në transfertë. Fillimisht do të duelojë me Gjeorgjinë më 16 nëntor dhe 3 ditë më pas do të përballet me Shqipërinë në “Air Albania” në orën 20:45.
Lexo gjithashtu
