Komisioni i Disiplinës vendosi që ndeshje Kamza-Besëlidhja do të luhet gjatë ditëve në vijim, pasi kujtojmë se kjo përballje e vlefshme për javën e fundit të Kategorisë së Parë u anulua për shkak se policia nuk mori përsipër mbarëvajtjen e ndeshjes.
Besëlidhja kërkoi tri pikët në tavolinë, por kërkesa e klubit lezhjan u rrëzua nga Disiplina dhe tani do të pritet vendimi për të caktuar datën se kur do të zhvillohet ky takim që do të përcaktojë skuadrën e dytë që do të ngjitet në Superligë.
Presidenti i Besëlidhjes, Gjok Noka shprehet për mediat se do ta dërgojë këtë çështje deri CAS për të kërkuar të drejtën.
“Jemi të zhgënjyer nga vendimi i Disiplinës. I njëjti rast është përsëritur edhe në ndeshjen Sopoti-Elbasani ku u dhanë tri pikët në tavolinë, por në rastin tonë nuk iu zbatua ky standard.
Do ta çojmë çështjen deri në CAS, sepse kemi të drejtë në pretendimin tonë për të marrë tri pikët në tavolinë. Komisioni i Disiplinës nuk shërben për asgjë”, tha presidenti i Besëlidhjes, Gjok Noka.
